Saher ka Waqt tha Masoom kaliyan Muskurati thi

Hawaein Khair Makdam ke Tarane Gungunati thi

Abhi Jibreel bhi Utre na the Kaabe ke Mimbar se

Ke Itne mein Sada Aayi Ye Abdullah ke Ghar se

 

Mubarak ho Shahe Har Do-Sara Tashreef Le Aaye

Mubarak ho Muhammad Mustafa Tashreef Le Aaye

 

Ye Kehti thi Ghar Ghar mein Ja Kar Haleema

Mere Ghar mein Khairul Wara Aa gaye hein

 

Uthi Chaar-soo Rehmaton ki Ghatayein

Muattar Muattar hein Saari Fazaaein

Khushi mein Ye Jibreel Nagmein Sunaye

Wo Shaf-e-Roze Jaza Aa gaye hein

 

Ye Kehti thi Ghar Ghar mein Ja Kar Haleema

Mere Ghar mein Khairul Wara Aa gaye hein

 

Ye Zulmat se Keh do ke Dere Utha lein

Ke hein Har Taraf Ab Ujaale Ujaale

Kaha Jinko Haq ne Siraajun Muneera

Mere Ghar Wo Noore Khuda Aa gaye hein

 

Ye Kehti thi Ghar Ghar mein Ja Kar Haleema

Mere Ghar mein Khairul Wara Aa gaye hein

 

Ye Sun kar Sakhi Aapka Aastana

Hai Daaman Pasaare huye Sab Zamaana

Nawaason ka Sadqa Nigahe Karam ho

Tere Dar pe Tere Gadaa Aa gaye hein

 

Ye Kehti thi Ghar Ghar mein Ja Kar Haleema

Mere Ghar mein Khairul Wara Aa gaye hein

 

Mukarrab hein Beshak Khaleelo Najee bhi

Badhi Shaan wale Kaleemo Maseeh bhi

Liye Arsh ne JinQadmon ke Bose

Wo Ummi Lakab Mustafa Aa gaye hein

 

Ye Kehti thi Ghar Ghar mein Ja Kar Haleema

Mere Ghar mein Khairul Wara Aa gaye hein

 

Nakeerain Jab Meri Turbat mein Aa kar

Kaheinge Ziyarat ka Muzda Suna kar

Utho Behre Taazeem Noorul Hasan Ab

Lahad mein Rasoole Khuda Aa gaye hein

 

Ye Kehti thi Ghar Ghar mein Ja Kar Haleema

Mere Ghar mein Khairul Wara Aa gaye hein