Har Waqt Tasawwur Mein, Madine Ki Gali Hai

Ab Darbadari Hai Na, Gharibul Watani Hai

 

Woh Shamme Haram Jis Se, Munawwar Hai Madinah

Kaa’Bey Ki Qasam Ronaqe, Kaa’Bah Bhi Wohi Hai

Har Waqt Tasawwur Mein

 

Us Shahr Mein Bik Jate Hain, Khud Aake Kharidar

Yeh Misr Ka Bazaar Nahin, Shahre Nabi Hai

Har Waqt Tasawwur Mein

 

Nazaron Ko Jhukae Huey, Khamosh Guzar Jao

Betaab Nigahi Bhi Yahan, Be Adabi Hai

Har Waqt Tasawwur Mein

 

 

Is Arze Muqaddas Pe, Zara Dekh Ke Chalna

Aey Qafile Walon Yeh, Madiney Ki Gali Hai

Har Waqt Tasawwur Mein

 

Haqq Iska Ada Sirf, Jabinon Se Na Hoga

Aey Sajda Guzaro Yeh, Dare Mustafawi Hai

Har Waqt Tasawwur Mein

 

Iqbal Mayn Kis Munh Se, Karun Madhey Muhammad

Munh Mera Bohat Chota Hai, Aur Baat Bari Hai

 

Har Waqt Tasawwur Mein